Mannlaus veröld

Saga mannsins er löng en margar aðrar lífverur hafa þó verið til mun lengur, að ekki sé minnst á sjálfa jörðina. Framan af lifðum við í sæmilegri sátt við heiminn en á tiltölulega skömmum tíma hefur þetta gjörbreyst; æ fleiri tegundir jurta og dýra eru í útrýmingarhættu, sífellt meiri ógn stafar af loftslagsbreytingum og mengun frá iðnaði okkar og lífsháttum. En hvað er til ráða?

Í þessari einstöku bók veltir Alan Weismann fyrir sér hvað myndi gerast á jörðinni ef mannskepnan hyrfi en allt annað yrði kyrr á sínum stað. Hvað yrði um öll mannvirkin okkar og eiturefnin sem við höfum búið til? Hvernig myndi dýrum og gróðri farnast í mannalausri veröld? Höfum við unnið óbætanlegan skaða á lofti, hafi og jörð eða er heiminum viðbjargandi?

Mannlaus veröld er athyglisverð og sláandi hugvekja um áhrif mannsins á umhverfið sitt – og hvað heimurinn gæti grætt á að losna við okkur!

Rithöfundurinn Andri Snær Magnason ritar formála bókarinnar en þýðandi hennar er Ísak Harðarson. Bókin hefur þegar verið þýdd á um 30 tungumál og unnið er að gerð kvikmyndar eftir efni hennar. Hún sat í 26 vikur samfleytt á metsölulista New York Times og var valin besta fræðirit ársins 2007 af Time Magazine.

*****
„Það er sjaldgæft að bók veki lesandann svo mjög til vitundar um náttúruna og framkalli um leið slíkan óhugnaðarhroll.“
California Literary Review

„Mannlaus veröld bregður upp myndum og spurningum. Forvitnilegum, aðkallandi og fræðandi.“
Andri Snær Magnason, úr formála.

Nánari upplýsingar og margmiðlunarefni tengt bókinni má finna hér.

Höfundar: Alan Weisman, Andri Snær Magnason