Hamborg 1946. Þúsundir eru á vergangi. Breska hernámsliðsins bíður nær óyfirstíganlegt verk: að reisa borgina úr rústum. Edmund og Rachael móðir hans eru komin yfir hafið til að vera loksins nálægt fjölskylduföðurnum Lewis, yfirmanni í hernum. Rachael er miður sín eftir að eldri sonur þeirra fórst í loftárás og hatar Þjóðverja skefjalaust. Fjölskyldan fær til umráða glæsihýsi við Saxelfi en Lewis leyfir eigendum hússins, þýskum ekkli og unglingsdóttur hans, að búa þar áfram. Fjandskapur og sorg setur mark á sambúðina og þvingað andrúmsloftið knýr fram sterkar tilfinningar. Við þessar einkennilegu aðstæður þurfa allir að lokum að horfast í augu við sjálfa sig.

Eftirköstin er áhrifamikil saga um afleiðingar hamfara; um brostnar vonir, skaddað fólk – og um mátt fyrirgefningarinnar.

Innblástur að sögunni segir Brook hafa fengið frá afa sínum sem einmitt var yfirmaður í breska hernum, sá um uppbyggingu Hamborgar eftir stríðið og flutti ásamt fjölskyldu sinni inn til þýskrar fjölskyldu á meðan verkefninu stóð.

Rhidian Brook (f. 1964) er breskur verðlaunahöfundur sem hefur samið efni fyrir dagblöð, útvarp, sjónvarp og kvikmyndir auk bókaskrifa. Eftirköstin er þriðja skáldsaga hans og hefur verið gefin út á fjölda tungumála.

Guðrún Eva Mínervudóttir þýddi.

****
„Ég hvet alla til að lesa þessa bók því hún er mjög vel skrifuð og hún snertir við manni.“
Anna Kristín Halldórsdóttir /

***
„Þetta er vel skrifuð bók að mörgu leyti, áhugaverð og falleg saga um fólk í aðstæðum sem enginn hefur valið sér að vera í, stundum grátbrosleg. Að auki veltir hún upp mörgum spurningum um mannlegt eðli og hegðun og skilur eftir sig ýmsar hugrenningar.“
Anna Lilja Þórisdóttir / Morgunblaðið

„Snilldarleg skáldsaga … stórbrotin.“
The Times

„Dásamlega skrifuð. Snertir mann djúpt.“
Independent

„Kemur á óvart hvað eftir annað.“
Guardian

„Grípandi saga af ást, svikum og hefnd.“
Literary Review

„Kröftug, falleg, myndræn.“
Sunday Times

„Einstök lesning.“
Daily Mail

„Svakaleg. Sterkt andrúmsloft.“
Sunday Telegraph