Fljótt fljótt, sagði fuglinn

Skáldsagan Fljótt fljótt sagði fuglinn eftir Thor Vilhjálmsson kom út árið 1968 og braut þá blað í íslenskum bókmenntum. Ókyrrð tímans gefur verkinu mikla undiröldu. Myndsækinn stíllinn litar allt, hugkvæmni höfundar, hispursleysi, orðkynngi og ótrúlegt auga fyrir blæbrigðum fegurðar og ljótleika. Umhverfið er bæði framandlegt og evrópskt og fléttað er saman fornum goðsögnum og svipmyndum úr lífi nútímamannsins til að bregða ljósi á hlutskipti mannanna.

Í nýjum formála að bókinni segir Kristján Jóhann Jónsson að Fljótt fljótt sagði fuglinn sé tímamótaverk í íslenskum módernisma og eitt af kennileitum nútímans í íslenskum bókmenntum.

Thor Vilhjálmsson, sem féll frá sviplega 2. mars 2011, var einn kunnasti og virtasti rithöfundur landsins allt frá því að hann sendi frá sér sína fyrstu bók, Maðurinn er alltaf einn, árið 1950. Hann hlaut fjölda viðurkenninga fyrir verk sín, m.a. Verðlaun Sænsku akademíunnar, Bókmenntaverðlaun Norðurlandaráðs, Íslensku bókmenntaverðlaunin og Menningarverðlaun DV í bókmenntum. Ákvörðun um endurútgáfu þessarar fyrstu skáldsögu Thors var tekin í kjölfar 85 ára afmælis höfundarins síðasta sumar. Útgáfan var unnin í samstarfi við Thor og verður nú eins konar bautasteinn um mikilhæfan höfund.

Bókin kemur út í kilju í ritröðinni Íslensk klassík.

„Thor Vilhjálmsson beitir hugmyndaríkri orðgnótt sem ekki á sér hliðstæðu.”
Preben Meulengracht Sørensen / Jyllands-Posten

„Stórbrotið barokkmálverk”
John Carlsen / Aarhus Stiftstidende

„Fljótt fljótt sagði fuglinn spannar yfir svo viðáttumikið bókmenntasvið að sjaldgæft er að finna slíkt í einni og sömu bókinni. . . .”
Sigvald Hansen / Frederiksborg Amts Avis

Höfundur: Thor Vilhjálmsson