Hér liggur skáld
2012

Hér liggur skáld

Höfundur: Þórarinn Eldjárn

Á hverju kvöldi þegar Hallbjörn sauðamaður leggst til svefns í yfirsetunni hugsar hann um kvæðið sem hann vill yrkja; það fjallar um Þorleif jarlsskáld sem sagan segir að hvíli þar undir sem sauðamaður sefur. „Hér liggur skáld,“ byrjar hann en kemst ekki lengra með kvæðið fyrr en Þorleifur hleypur sjálfur undir bagga – í draumi, því að hann hefur legið dauður í haugi sínum í tvö hundruð ár.

„Sagan segir“ – ja, hvað segir sagan? Af Þorleifi og ættingjum hans í Svarfaðardal eru fornar sagnir um harðvítug átök höfðingjanna í dalnum, fyrirboða og forynjur, afdrifaríka kaupferð til Noregs, grimmd og dráp, kynngimagnaðan hefndarkveðskap og ómennskt víg á Þingvöllum.

Þórarinn Eldjárn segir hér og semur örlagasögu Þorleifs; fléttar saman, prjónar við og fyllir í eyður svo að úr verður þétt og áhrifarík frásögn af hógværu skáldi sem skorast ekki undan knýjandi verkefni: að bjóða illskunni birginn.