Ása Guðmundsdóttir Wright var læknisdóttir úr Stykkishólmi sem hélt ung til Englands þar sem hún lærði hjúkrun, tók þátt í aðgerðum kvenréttindakvenna og saumaði sér kjól úr gardínuefni sem hún klæddist þegar hún gekk fyrir konung. Hún giftist breskum lögfræðingi og varð hefðarfrú í Cornwall.

Þau hjónin fluttu úr gráma eftirstríðsáranna til Karíbahafseyjarinnar Trínidad og keyptu þar búgarð inni í frumskógi. Þar lifðu þau litríku lífi og spreyttu sig meðal annars á flóðsvínaræktun. Í ellinni stóð Ása að stofnun náttúruverndarsvæðis sem ber nafn hennar og er víðfrægt. Þrátt fyrir nær sextíu ára dvöl á framandi slóðum gleymdi hún aldrei uppruna sínum og gaf eigur sínar heim til Íslands að leiðarlokum.

Saga Ásu er saga stórmerkrar konu sem ekki batt bagga sína sömu hnútum og samferðamenn og sat ekki alltaf á friðarstóli.

Höfundur bókarinnar, Inga Dóra Björnsdóttir, hefur leitað heimilda í skjalasöfnum hérlendis, í Englandi, á Trínidad og í Bandaríkjunum til að ná fram sem bestri mynd af þessari óvenjulegu konu. Inga Dóra hefur áður skrifað bókina Ólöf eskimói sem kom út árið 2004.

„Frásögn Ingu Dóru af lífi Ásu Guðmundsdóttur Wright er lifandi og skemmtileg.“
Silja Bára Ómarsdóttir / eyjan.is

„Flott bók um merkilega konu.“
Jenný Anna Baldursdóttir bloggari

„Frásögn Ingu Dóru af lífi Ásu Guðmundsdóttur Wright er lifandi og skemmtileg. Hún nær að sýna bæði skondnu hliðarnar á henni, lýsingar af samlífinu við dýraríkið á Trinidad eru jafn fyndndar og lýsingar á samskiptum við þjónustufólkið í Englandi er framandi. Mikil rannsóknarvinna liggur að baki bókinni, enda eru nær fjörutíu ár frá því Ása lést og ekki margir eftir sem eiga minningar um hana. … konan sem Inga Dóra segir okkur frá er vel þess virði að kynnast. Hún er greind, skapmikil, fljótfær og jafn gölluð og flest mannfólkið.“
Silja Bára Ómarsdóttir / eyjan.is