Fjöruverðlaunin, bókmenntaverðlaun kvenna, voru afhent við hátíðlega athöfn í Höfða 16. janúar síðastliðinn. Verðlaunin eru veitt árlega í flokki fagurbókmennta, fræðibóka og rita almenns eðlis og í flokki barna- og unglingabókmennta. Forlagið er stolt af höfundum sínum sem hlutu verðlaunin. Kristín Helga Gunnarsdóttir hlaut verðlaunin fyrir Fíasól gefst aldrei upp í flokki barna- og unglingabókmennta og þær Auður Jónsdóttir, Bára Huld Beck og Steinunn Stefánsdóttir fyrir Þjáningarfrelsið – óreiða hugsjóna og hagsmuna í heimi fjölmiðla. Í flokki fagurbókmennta hlaut Guðrún Eva Mínervudóttir Ástin, Texas sem gefin er út af Bjarti.
Þetta er í þrettánda skiptið sem verðlaunin eru veitt og afhenti Dagur B. Eggertsson borgarstjóri verðlaunahöfum blóm og verðlaunagripi.