Ólafur Gunnarsson er fæddur í Reykjavík 18. júlí 1948. Hann lauk verslunarprófi frá VR 1969, stundaði verslunarstörf, var bifreiðastjóri læknavaktar en hefur stundað ritstörf frá 1974. Ólafur birti ljóð á prenti áður en fyrsta skáldsaga hans, Milljón-prósent-menn, kom út 1978. Hann hefur sent frá sér skáldsögur, smásögur og skrifað barnabækur. Skáldsaga hans, Tröllakirkja var tilnefnd til Íslensku bókmenntaverðlaunin 1992 og ensk þýðing hennar var einnig tilnefnd til IMPAC Dublin bókmenntaverðlaunanna 1997. Leikgerð unnin upp úr sögunni var sýnd á stóra sviði Þjóðleikhússins árið 1996 og kvikmyndaréttur hennar hefur jafnframt verið seldur. Öxin og jörðin eftir Ólaf vann til Íslensku bókmenntaverðlaunanna 2003. Verk eftir Ólaf hafa verið þýdd á erlend mál, meðal annars barnabókin Fallegi flughvalurinn sem var tilnefnd til Norrænu barnabókaverðlaunanna 1990. Þá hafa skáldsögur hans fyrir fullorðna komið út í þýðingum á ýmsum tungumálum. Ólafur hefur einnig þýtt skáldsögur og leikrit á íslensku.