„Menn leita að orku í stríði og friði, lífið þrífst á orkunni í okkur sjálfum og í náttúrunni, sagði gamli maðurinn vesældarlega.“

Á einangraðan stað suður með sjó, þar sem aldrei gerist neitt, berast fregnir af átökum heimsstyrjaldarinnar. Fyrr en varir hefur atburðarásin teygt anga sína þangað og nútíminn heldur innreið sína með ófyrirsjáanlegum afleiðingum.

Höfundur dregur upp hárbeitta mynd af samfélagi á tímamótum; af eilífri baráttu manneskjunnar fyrir tilveru sinni, glímunni við fáfræði og fásinni, sannleika og lygi, heimsku og græðgi.

Og sagan endurtekur sig stöðugt við nýjar og breyttar aðstæður, kynslóðir koma og fara … en ættarfylgjan lætur ekki að sér hæða, enginn flýr frá sjálfum sér.

Guðbergur Bergsson hefur skrifað fjölmargar bækur, þýtt öndvegisrit og ritað greinar í blöð og tímarit. Hann hefur hlotið ýmis verðlaun og viðurkenningar fyrir verk sín, meðal annars Íslensku bókmenntaverðlaunin og verðlaun Sænsku bókmenntaakademíunnar.

Guðbergur Bergsson lauk prófi í spænskum fræðum, bókmenntum og listasögu frá La Universidad de Barcelona 1958. Fyrsta bók hans, Músin sem læðist, kom út 1961. Hann hefur skrifað barnabækur, ljóð, smásögur, skáldsögur, skáldævisögur og greinar um bókmenntir, listir og þjóðfélagsmál í dagblöð og tímarit bæði hér á landi og í útlöndum. Hann er afkastamikill þýðandi og hefur átt sinn þátt í því að kynna fyrir Íslendingum spænskar og portúgalskar bókmenntir. Margar bækur Guðbergs hafa verið þýddar á erlend tungumál.

* * * *
„… sterkasta og merkilegasta bók Guðbergs langan tíma, bók sem kallar mann aftur til frekari umhugsunar, íhugunar og greiningar … Táknsaga um íslenska þjóð tuttugustu öld sem ber mörg bestu einkenni höfundarins.“
Jón Yngvi Jóhannsson / Fréttablaðið

* * * *
„Eiginlega er þessi sýn Guðbergs þjóð sína þannig að maður verður örmagna af neikvæðninni, þótt maður kalli ekki allt ömmu sína þeim efnum. Fyndnin er þó líka þarna dágóðum skömmtum. Þessi guðbergska fyndni, sem er einhvers konar vaðall með óvæntum snúningi, yfirleitt ljómandi ósmekklegum. Fyndnin er stundum góðlátlega írónísk, en oftar beisk og illgjörn, mun hráslagalegri en mörgum fyrri bókum höfundar.“
Þórunn Hrefna Sigurjónsdóttir / Fréttatíminn

„… hann er í stuði hérna … það gladdi mig alveg ofboðslega að fá þessa bók frá Guðbergi.“
Egill Helgason / Kiljan

„Þetta er gamli góði Guðbergur. Hans langbesta bók síðan hann sendi frá sér Missi … það er unun að lesa þetta.“
Kolbrún Bergþórsdóttir / Kiljan

„Þrátt fyrir ömurleikann og vonleysið er ekki hægt annað en að lesa þessa mögnuðu bók upp til agna til að komast að því hvernig fer fyrir okkar ógæfulegu, íslensku þjóð sem er dregin sundur og saman í nístandi háði og afhjúpuð svona miskunnarlaust og snilldarlega.“
Steinunn Inga Óttarsdóttir/Kvennablaðið

„… heillandi saga. Guðbergi tekst ævinlega að skapa áhugaverðan og ofurlítið draumkenndan heim í bókum sínum.“
Guðríður Haraldsdóttir / Vikan