Alex Rider er ósköp venjulegur fjórtán ára strákur. En daginn sem frændi hans lætur lífið í óútskýrðu slysi snýst veröld hans á hvolf og innan skamms er hann lentur í þjálfunarbúðum hjá sérsveit bresku leyniþjónustunnar, MI6.

Eftir stutta en stranga þjálfun heldur Alex til Cornwall þar sem auðmaðurinn Herod Sayle er að framleiða ofurtölvuna Þrumufleyg. Slíkar tölvur ætlar Sayle að afhenda öllum skólum landsins með viðhöfn eftir fáeina daga og MI6 grunar að brögð séu í tafli. Tíminn er naumur – og þó að Alex sé ungur er hann ekki of ungur til að deyja …

Bækur Anthony Horowitz um unga njósnarann Alex Rider eru 6 talsins, þær hafa verið þýddar á fjölda tungumála, selst í níu milljónum eintaka um allan heim og hlotið margs konar verðlaun og viðurkenningar, meðal annars bresku barnabókaverðlaunin og viðurkenningu samtaka bandarískra bókasafnsfræðinga. Þrumufleygur er fyrsta bókin.

„Gleymdu Spy Kids! Ef þú vilt vita hvernig er að vera 14 ára James Bond skaltu lesa bækur Anthony Horowitz um Alex Rider.“
The Guardian Children’s Book Supplement

„Horowitz sýnir hér og sannar að það er miklu svalara að vera ungur James Bond en galdrakarl.“
The Mirror