Málverk Páls Sólnes er íhugult og ljóðrænt, það uppgötvar án orða. Áhorfandinn er leiddur inn í heim myndanna, ekki gegnum orðið, sem óhjákvæmilega túlkar og takmarkar, heldur einungis gegnum grunnþætti myndanna sjálfra, ljósið, litina og rýmið. Afstaða litarins til landslagsins í verkum Páls er ekki eftirhermandi. Hann ferðast á mörkum landslags og möguleikum þess rýmis sem verður til í eigin krafti litanna. Einnig má íhuga verk hans sem uppbyggingu lita með ívafi af tilvísunum til náttúrunnar og landslagsins. Við skynjum himinn, vatn, hæðir, holt og gróður, án þess að verkin yfirstígi nokkru sinni mörk þess að herma ákveðna fyrirmynd. Titill bókarinnar, “Earth was Found Nowhere” er fenginn úr Völuspá: “Jörð fannst æva né upphiminn”. Tóm, hvítur dúkur, tabúla rasa – möguleiki til sköpunar hér og nú. Páll Sólnes er fæddur og uppalinn á Brekkunni á Akureyri, en hefur að mestu lifað og starfað í Danmörku og Svíþjóð. Hann er eitt best varðveitta leyndarmál íslenskrar myndlistar.