Höfundur: Njörður P. Njarðvík

„Þeir dagar koma að Fritz fær algert ógeð á hreint öllu. Hann fær andstyggð á dópinu og öllu sem því er tengt, harkinu, höstlinu, dílerunum og félögunum, ef félaga skyldi kalla, á falsinu, lygunum, útiganginum ? En þrátt fyrir ógeðið, kemst ekki að honum sú hugsun að hann geti lifað án heróíns. Um leið vaknar samt áköf þrá eftir „eðlilegu“ og „venjulegu“ lífi. Bara ekki án heróíns.“

Fyrir tveimur áratugum sögðu sömu höfundar frá reynslu sama pilts í sögunni Ekkert mál. Þá var hann kallaður Freddý og bjó í Kaupmannahöfn. Nú gegnir hann nafninu Fritz og heldur til í Amsterdam. En þetta er sami maður, í sama vítahringnum sem þrengir að honum eins og ósýnilegur fjötur. Löng barátta við fíknina hefur stundum fært honum góða daga, en oftar en ekki dýpri niðurlægingu og þjáningu en orð fá lýst. Þýðir nokkuð að láta sig dreyma um að verða frjáls af eitrinu sem engu eirir?

Feðgarnir Njörður P. Njarðvík og Freyr Njarðarson hafa lagt saman í áhrifamikla og átakanlega sögu. Þetta er hlífðarlaus lýsing á hörðum örlögum fíkilsins og aðstandenda hans. Persónulegum harmleik er snúið í afburða vel gerða frásögn sem með einlægni sinni og hispursleysi lætur engan ósnortinn.