Höfundur: Jens Lapidus

Fundið fé er myrk spennusaga úr undirheimum Stokkhólms þar sem allt snýst um eiturlyf, peninga og hefnd. Aðalpersónurnar eru þrír glæpamenn:

  • Jorge er dópsali sem sleppur úr fangelsi á ævintýralegan hátt og ætlar að forða sér úr landi en þarf fyrst að negla þá sem komu honum í steininn.
  • JW er strákurinn sem selur yfirstéttarliðinu kókaín á flottustu klúbbunum til að fjármagna tvöfalt líf sitt.
  • Mrado er serbneskur mafíuhandrukkari sem misþyrmir og drepur án samviskubits en lætur sig dreyma um hamingjusama tilveru með ungri dóttur sinni.

Allir leita þeir að skyndigróða og örlög þeirra tvinnast saman gegnum kókaínið; þar má hafa skjót uppgrip, þar er fundið fé. Lesendur eiga ótrúlegan lestur í vændum.

Jens Lapidus er ungur sænskur lögfræðingur og rithöfundur á uppleið. Hann hefur meðal annars varið alræmda glæpamenn og kynnst veröld þeirra, þá reynslu nýtir hann sér út í æsar til að skapa snjalla og æsispennandi sögu með þjóðfélagslegum broddi.