Hafiði heyrt um furðuveruna sem á heima uppi í skýjunum?

Það er sko hann Goggó sem á heima þar. Goggó á nokkra ofurkrafta, hann getur meðal annars: Talað við dýr, hoppað úr mjög mikilli hæð og hann er góður vinur. Goggó á allskonar vini. Besti vinur Goggó heitir Kassi og er talandi og gangandi kassi. Goggó og Kassi gera allt saman. Síðan á Goggó líka aðra vini, hann á stelpuvin sem heitir Goggólína og svo er það Svarta krákan, sem er ofurhetja skýjanna. Einn daginn ákveður Goggó að láta gamlan draum rætast og klífa Stóra fjall og fær hann Kassa með í för. Saman lenda þeir í ótrúlegum ævintýrum og hjálp berst úr óvæntri átt.

Auðunn Sölvi Hugason hefur skrifað fjölmargar bækur á borð við Pizza pizza, mamma pizza og Bingó bingó, pabbi bingó.

Auðunn er nemandi í 6. bekk í Setbergsskóla og á öðru ári í Leiklistarskóla Borgarleikhússins. Hann byrjaði ungur að sækja fjölbreytt námskeið í leiklist, söng og dansi og hefur verið heillaður af leikhúsi frá fyrstu sýningu. Lengst af hefur hann verið nemandi í Dansskóla Birnu Björns, bæði í söngleikjadeild og dansi. Hann lék Sigga sítrónu í Mömmu klikk frá 7-9 ára aldurs og var kosinn Leikari ársins á Sögum, verðlaunahátíð barnanna, árið 2020 fyrir það hlutverk. Hann hefur tekið þátt í mörgum skemmtilegum verkefnum hjá Krakkarúv, leikið í sjónvarpsseríum, talsett barnaefni og auk þess lék hann í bíómyndinni Svar við bréfi Helgu. Auðunn er mjög oft með upptökuvél á lofti og hefur gert fjölda heimagerðra stuttmynda og skemmtiþátta.