Höfundur: Xinran

Þegar Xinran var lítil stúlka barst út orðrómur í Kína um grimmileg örlög kínversks hermanns sem hafði verið kastað fyrir hrægamma í Tíbet, orðrómur sem í senn hrelldi hana og heillaði. Þrjátíu árum síðar hitti hún eldri konu sem sagði henni ótrúlegan sannleikann að baki þessarar sögusagnar. Hún hét Shu Wen og hafði meiri hluta ævi sinnar flakkað ein um hásléttur Tíbets.

Af einskærri hugsjón hafði Kejun, eiginmaður Shu Wen, gerst herlæknir en aðeins örfáum mánuðum eftir að þau gengu í hjónaband fréttist að hann hefði fallið í átökum í Tíbet. Shu Wen neitaði að trúa þessu og lagði sjálf land undir fót sem herlæknir til að leita hans. Landslagið í Tíbet kom henni gjörsamlega í opna skjöldu ? ógnvekjandi þögnin, gríðarlega há fjöllin og auðnin. En staðfastur ásetningur hennar rak hana áfram. Hann rak hana áfram þegar hún varð viðskila við herdeild sína og þegar hún var týnd í fjöllunum í norðurhluta Tíbets. Hann rak hana áfram öll árin sem hún flakkaði ein um í framandi menningarheimi. Þrjátíu árum síðar komst hún að sannleikanum um afdrif eiginmanns síns …

Dregin er upp einstæð mynd af örlögum konu við aðstæður þar sem það eitt að halda lífi var sigur.

Xinran fæddist í Beijing árið 1958 þar sem hún var farsæll blaðamaður og útvarpsþáttastjóri. Hún fluttist til London árið 1997 og hóf að skrifa fyrstu bók sína Dætur Kína sem varð fljótt metsölubók á heimsvísu. Himnaför er önnurbók hennar. Xinran kom til Íslands á síðasta ári ásamt manni sínum og syni og hélt hér fyrirlestur í tengslum við útkomu fyrstu bókar sinnar.