Í viðjum drambs og hroka er skáldsaga en byggir á raunverulegum atburðum. Hér er á ferðinni alþýðusaga er segir frá konu sem heimsækir bernskuslóðir sínar.

Sagan segir frá lífshlaupi Helgu, uppeldi hennar og æsku, námsárum og störfum erlendis, hvernig hún kynntist eiginmanninum, sambúð þeirra, ást, skilnaði og veikindum. Helga fer í huganum yfir líf sitt, jafnframt því að gera einskonar uppgjör vegna tengslaslita við foreldra sína sem hundsuðu hana í tuttugu ár vegna þess eins að hún giftist manni sem hún elskaði.

Saga þessi leitar föngum í dramatískum raunveruleika og fjallar um óbilandi ást. Hún fjallar einnig um mannlíf, tilfinningaleysi, óheiðarleika í viðskiptum, hroka og sýndarmennsku. Í bókinni er greint frá djúpu hugarangri og gæti hún því flokkast undir fræðslurit um sálarstríð fólks og hegðan þess og væri því öllum holl lesning. Bókin endar síðan á 99 erinda ljóðabálki.

Árni Hjörleifsson er rafvirki að mennt, en hefur verið virkur í greinaskrifum og skrifað skáldsögur og ljóð í frístundum. Í viðjum drambs og hroka er hans fyrsta útgefna bók. Árni er þekktari fyrir afskipti sín af stjórn- og verkalýðsmálum en hann sat í bæjarstjórn Hafnarfjarðar í átta ár auk ýmissa annarra starfa og er nú oddviti Skorradalshrepps.