Höfundur: Gústaf S. Berg

Ert þú einn af þeim sem brýtur aldrei um það heilann hvað ýmis bítlalög myndu heita upp á spænsku, eða hvernig auðveldast er að margfalda stórar tölur með 11? Eða ertu kannski í hópi þeirra sem leiða aldrei hugann að kjörum böðla á Íslandi né hvað sé hægt að dunda við á klóinu á meðan beðið er eftir þeim stóra? Og hver hefur svo sem ekki velt því ekki fyrir sér hvað orðið bræsa merki eða hver Eyjólfur skyrhnakkur hafi eiginlega verið ef út í það er farið?

Náðhúsið 2004 bætir úr brýnni þörf og teflir fram stoppfullri bók af fánýtum fróðleik, fimmaurabröndurum, heilabrotum og dægradvöl af ýmsu tagi. Ef þig vantar að vita hver séu skrýtnustu götuheitin á Íslandi, hvað hundur Hitlers hafi heitið eða hvernig best sé að þekkja hreina mey eða svein þarftu ekki að leita lengra. Hér eru kynstur svara við spurningum sem þér hefur aldrei dottið í hug að spyrja

Hvort sem þú ert á ferð og flugi eða nýtur kyrrðar er Náðhúsið 2004 svarið. Engin spurning!

- Tvímælalaust bók ársins, G.Berg
- Gat lagt hana frá mér ... en vildi það bara ekki!, GSB
- Hrífandi saga um einstæð örlög, Gústav S. Berg.
- Alveg sprenghlægileg, G. S. B. Erg