Höfundar: Gísli Guðjónsson, Anna Hildur Hildibrandsdóttir

Nafn Gísla Guðjónssonar réttarsálfræðings tengist mörgum umtöluðustu dómsmálum síðustu áratuga, s.s. máli fjórmenninganna frá Guildford, sexmenninganna frá Birmingham, Birgittumálsins í Noregi og nú síðast morðinu á sjónvarpsstjörnunni Jill Dando. Hann hefur átt þátt í frelsun fjölda ólánsamra einstaklinga sem hafa setið árum og jafnvel áratugum saman í fangelsi fyrir glæpi sem þeir frömdu ekki. Ferill Gísla er langur og hann kemur víða við. Hann hefur sérhæft sig í lygamælingum, fölskum og óáreiðanlegum játningum og sérþörfum viðkvæmra einstaklinga innan refsivörslukerfisins. Hann starfar jöfnum höndum fyrir lögreglu, ákæruvaldið og verjendur. Auk þess vinnur hann að meðferð geðsjúkra, sinnir kennslu og skriftum. Hér gefst lesendum einstakt tækifæri til að kynnast störfum þessa merka Íslendings sem hefur brotist til mennta og áhrifa í hinum stóra heimi og fylgjast með baráttu hans fyrir réttlæti og réttaröryggi.