Höfundur: Róbert Löhr

Þegar Wolfgang von Kempelen kynnir til sögunnar ótrúlega uppfinningu sína í Vín árið 1770 verður uppi fótur og fit: þetta er skákvél í mannsmynd. Að baki býr þó ekki hugvit Kempelens eins og flestir trúa, heldur snilligáfa ítalska dvergsins Tibors sem stjórnar vélinni innan frá – því í raun er þetta stórbrotna og umtalaða tækniundur ekki annað en meiri háttar sjónhverfing og tál.

Kempelen fer með fylgdarliði sínu vítt um Evrópu til að sýna skákmenni sitt og hvarvetna undrast menn fyrirbærið og dást að því. En þegar fögur tælandi hefðarkona lætur lífið á voveiflegan hátt í návist Skáktyrkjans vakna illar grunsemdir og tortryggni í garð uppfinningamannsins.

Hvert er hið myrka leyndarmál að baki vélinni og af hvaða rótum er vald hennar runnið?

Skáktyrkinn eftir Robert Löhr er margslungin söguleg skáldsaga og fjallar á áhrifamikinn hátt um þjóðsagnakennda uppfinningu og þann vef blekkinga, öfundar, hneykslismála og losta sem spinnst í kringum hana við hirðina í Vínarborg í lok 18. aldar.