Bók þessi var gefin út í tilefni af aldarafmæli skólahalds í Borgarnesi haustið 2008 og 50 ára afmæli skólahalds að Varmalandi 2005.

Upphaf þess tímabils sem fjallað er um í bókinni miðast í aðalatriðum við setningu laga um uppfræðslu barna í skrift og reikningi árið 1880, sem leiddi til þess að víða voru ráðnir heimiliskennarar og stofnaðir skólar. Þáttaskil urðu þó er lög um fræðslu barna voru sett 1907, en í framahaldi af því komu til farskólar í einstökum hreppum og stofnaðir voru fastir skólar í kauptúnum, m.a. í Borgarnesi. Í bókinni er fjallað ítarlega um farskóla í sjö hreppum sýslunnar á árunum 1907 til 1954, barna- og unglingaskólann í Borgarnesi 1908 til 2007 og greint frá stofnun og starfi Varmalandsskóla frá 1954 til 2007. Þróunarsaga barnafræðslu í Mýrarsýslu er einnig merkileg fyrir það að þar var settur á stofn fyrsti heimavistarskóli á landinu sem hreppar í heilli sýslu stóðu sameiginlega að.

Fjöldi mynda prýðir bókina og hefur víða verið leitað fanga til að gera þann þátt sem fjölbreyttastan.