Fáar skipulegar atlögur hafa verið gerðar að því á síðustu misserum að kynna ítalska ljóðlist fyrir íslenskum lesendum. Hinum stærstu skáldjöfrum hafa vissulega verið gerð skil með greinum í tímaritum, eða stökum þýðingum, en samtímaskáld hafa mikið til legið óbætt hjá garði. Því kviknaði nýlega sú hugmynd hjá velunnurum ítalskrar ljóðlistar að efna í sýnisbók starfandi skálda sem vakið hafa athygli í heimalandinu og víðar.

Í þessari bók er að finna ljóð eftir tíu ítölsk skáld sem samsvara þessari lýsingu. Þau valdi skáldkonan Elisa Biagini, sem sjálf er í þeirra hópi, og þýðingar gerði Sigurbjörg Þrastardóttir. Speglað verklag er að finna í ítölsku kveri um íslenska samtímaljóðlist sem í undirbúningi er á Ítalíu.

Skáldin sem hér birtast yrkja um náttúru, sögu og persónulega reynslu, þau vísa í ævintýri og samtímatækni og yrkja ýmist frjálst eða bregða fyrir sig rími. Ljóðin eru brot úr stærri bálkum, eða dæmi úr ólíkum bókum, tilfærð af höfundunum sjálfum. Lesendum er óskað góðrar ferðar í gegnum bláan skóg.