Um bókina
Skaftáreldar og móðuharðindin eru mestu náttúruhamfarir sem hér hafa orðið á sögulegum tíma. Og höfðu raunar svo víðtæk og skelfilega áhrif um víða veröld að umfang þeirra er enn að koma í ljós. Á Íslandi lentu þúsundir á vergang; straumar flóttafólks bárust vítt og breitt um landið, bústofninn féll unnvörpum og hungursneyð geisaði meðal landsmanna. Fimmti hluti þjóðarinnar dó á árum Skaftárelda og móðuharðinda enda brugðust yfirvöld við seint og illa.
Þessi ósköp hafa lengi verið rithöfundinum og fjölmiðlamanninum Illuga Jökulssyni hugleikin, og hér birtist sýn hans á hamfarirnar og skelfileg áhrif þeirra. Við söguna koma helstu fyrirmenn landsins auk útlendra lærdómsmanna og pótintáta af ýmsu tagi. Eldklerkurinn Jón Steingrímsson er að sjálfsögðu í forgrunni, en einnig sprettur hér íslenskt alþýðufólk ljóslifandi fram, svo sem Rögnvaldur halti, Látra-Björg, Bárður í Króktúni, Tófu-Gunna og mæðumaðurinn Ásmundur Jónsson, svo fáeinir séu nefndir. Útkoman er einstæð og áhrifamikil mynd af sögu þjóðar á sínum mestu örlagastundum.
