Guðbergur Bergsson látinn

  • Höfundur: Ritstjórn Forlagsins

Guðbergur Bergsson lést mánudagskvöldið 4. september á heimili sínu í Mosfellsbæ, eftir skammvinn veikindi. Guðbergur var einn dáðasti, áhrifamesti og umdeildasti rithöfundur síðari ára á Íslandi.

Guðbergur fæddist þann 16. október árið 1932 í Grindavík. Að loknu námi í kennslufræðum frá Kennaraskóla Íslands, hélt hann til náms á Spáni og lauk prófi í spænskum fræðum, bókmenntum og listasögu árið 1958, frá La Universidad de Barcelona. Fyrsta skáldsaga Guðbergs, Músin sem læðist, kom út árið 1961 en sama ár var ljóðabókin Endurtekin orð einnig gefin út. Eftir það sendi hann frá sér fjölda bóka af ýmsum toga, smásögur, skáldsögur, barnabækur, skáldævisögur og fleira. Auk þess skrifaði hann greinar um bókmenntir, listir og þjóðfélagsmál í dagblöð og tímarit. Hann var afkastamikill þýðandi úr spænsku og portúgölsku og átti mikilvægan þátt í að kynna spænsku- og portúgölskumælandi höfunda hér á landi.

Bækur Guðbergs hafa verið þýddar á fjölmörg tungumál og skáldsagan, Svanurinn, hefur vakið mikla athygli víða um heim. Kvikmynd Ásu Hjörleifsdóttur sem byggð er á bókinni var frumsýnd árið 2017, en kvikmynd gerð eftir skáldsögunni Missi er einnig væntanleg.

Guðbergur hlaut margvíslegar viðurkenningar fyrir verk sín og var sæmdur Heiðursorðu Spánarkonungs (Riddarakross afreksorðunnar). Hann hlaut Íslensku bókmenntaverðlaunin tvisvar; fyrst árið 1991 fyrir skáldsöguna Svaninn, og aftur 1997 fyrir Faðir og móðir og dulmagn bernskunnar: skáldævisaga. Árið 2004 hlaut Guðbergur Norrænu bókmenntaverðlaun Sænsku akademíunnar en tveimur árum síðar var hann tilnefndur til hinna virtu ítölsku Nonino-verðlauna fyrir skáldsögu sína Svaninn.

Eftirlifandi sambýlismaður Guðbergs er Guðni Þorbjörnsson, flugmaður og framkvæmdastjóri ARTPRO ehf. Þeir hafa í rúman áratug búið í Mosfellsbæ og Berlín, auk þess að eiga aðsetur í Reykjavík, Grindavík og Madrid. Saman eiga þeir Bengal kettina Pútín og Picasso.

Forlagið sendir aðstandendum Guðbergs og vinum innilegar samúðarkveðjur.

 

Deila:

Fleiri fréttir

Arndís og Sigrún tilnefndar til ALMA-verðlaunanna 2027

Það er gleðiefni að tveir höfundar Forlagsins, Arndís Þórarinsdóttir og Sigrún Eldjárn, eru tilnefndar til alþjóðlegu ALMA-verðlaunanna 2027. Tilnefningarnar eru viðurkenning á framlagi þeirra til barna- og ungmennabókmennta. ALMA-verðlaunin, Astrid Lindgren Memorial Award, eru kennd við sænska barnabókahöfundinn Astrid Lindgren og veitt árlega einstaklingi eða stofnun fyrir mikilvægt framlag til barnabókmennta. Að þessu sinni eru…

Síðasti dagurinn hlýtur Sólfaxa – íslensku barnabókaverðlaunin 2026

Síðasti dagurinn eftir Matthildi Yrsu Sigurðardóttur, Þórunni Rakel Gylfadóttur og Diddu Flygenring hefur hlotið Sólfaxa – íslensku barnabókaverðlaunin árið 2026 Sólfaxi – íslensku barnabókaverðlaunin eru veitt fyrir handrit að myndríkri bók. Samkeppnin er nafnlaus og senda þátttakendur gögn inn undir dulnefni. Metþátttaka var í keppninni að þessu sinni en rúmlega fimmtíu handrit bárust. Eftir að…

Nýjar raddir 2027

Forlagið efnir í tíunda skipti til handritasamkeppni undir heitinu Nýjar raddir. Óskað er eftir handritum eftir höfunda sem ekki hafa gefið út fleiri en eitt prósaverk áður hjá atvinnuforlagi. Handritið skal vera á íslensku og einn samfelldur texti eða safn styttri texta og á lengd við nóvellu eða stutta skáldsögu (um 15.000 til 30.000 orð),…

Stjörnu-Sævar og Villi Neto ræða sólmyrkva í Bókahillunni

Í nýjasta þætti Bókahillunnar, hlaðvarps Forlagsins um bækur, höfunda og bókmenntir, ræðir Villi Neto við Stjörnu-Sævar um sólmyrkva. Þeir fara um víðan völl og ræða meðal annars frægðina, geimverur, teiknimyndir og auðvitað sólmyrkva. Sævar segir frá því hvernig best sé að undirbúa sig fyrir sólmyrkva og fylgjast með honum á öruggan hátt. Í þættinum segir…

Karfan þín

Valmynd