Einar Már og Karlakór Grafarvogs

  • Höfundur: Ritstjórn Forlagsins

Óvenjulegur en afar áhugaverður listviðburður verður í Grafarvogskirkju sunnudaginn 6. desember nk. kl. 17.00, þegar fram fara tónleikar Karlakórs Grafarvogs í bland við upplestur Grafarvogsskáldsins Einars Más Guðmundssonar rithöfundar. Á tónleikunum sem hafa yfirskriftina Hundadagar að hausti, verður fléttað saman á skemmtilegan hátt, upplestri Einars Más sem les úr nýútkominni bók sinni Hundadagar og söng Karlakórs Grafarvogs sem flytur lög úr söngleiknum „Þið munið hann Jörund“.

Einar Má Guðmundsson rithöfund þarf vart að kynna. Hann er margverðlaunaður rithöfundur og hefur meðal annars hlotið Bókmenntaverðlaun Norðurlandaráðs og Norrænu bókmenntaverðlaun Sænsku akademíunnar. Bækur hans hafa verið þýddar á fjölda tungumála og hann nýtur slíkra vinsælda í Danmörku að Hundadagar voru gefnir út þar í landi samtímis útgáfunni hér heima.

Hundadagar hafa hlotið einróna lof gagnrýnenda, bæði íslenskra sem og danskra og segir bókmenntagagnrýnandi danska dagblaðsins Politiken m.a. eftirfarandi um Hundadaga: „Einar Már er sögumaður af Guðs náð … meistaraverk!“ Bókmennagagnrýnandi Fréttatímans er ekki síður hrifinn: „… sagan smellur saman sem ein heild. Ansi hreint hressandi, krassandi og skemmtileg heild, meira að segja. Einar Már er hér í essinu sínu … Ég held svei mér þá að Einar Már hafi ekki skrifað betri bók en þessa síðan hann setti síðasta punktinn í Engla alheimsins.“

Það er engin ástæða til annars en að hvetja Grafarvogsbúa sem og aðra landsmenn til að mæta á tónleikana og njóta samspils Karlakórs Grafarvogs og Einars Más þar sem Jörundur hundadagakonungur og saga hans er miðdepill tónleikanna. Óvenjulegt – en um leið afar áhugavert – er að flétta saman sögu og söng með þeim hætti sem þarna verður gert.

Á efnisskrá tónleikanna verða – eins og fyrr sagði – lög úr söngleiknum Þið munið hann Jörund. Einnig mun karlakórinn syngja vinsæl íslensk og erlend lög úr ýmsum áttum.

Karlakór Grafarvogs er fimm ára gamall, en þrátt fyrir ungan aldur hefur kórinn stimplað sig rækilega inn í tónlistarlífið í Reykjavík. Hafa tónleikar kórsins jafnan verið fjölsóttir og gestir skemmt sér hið besta, enda kórinn þekktur fyrir líflega framkomu og skemmtilegt lagaval.

Stofnandi og stjórnandi kórsins er Íris Erlingsdóttir, en um þrjátíu strákar á ýmsum aldri lúta hennar stjórn og þykir fátt skemmtilegra en að gleðja sjálfa sig og aðra með söng og gamanmálum. Kórinn heldur jafnan tónleika í Grafarvogskirkju á hausti og vori, en kórinn kemur einnig fram við sérstök tækifæri við messuhald í Grafarvogskirkju. Píanóleikari kórsins er Glódís Margrét Guðmundsdóttir.

Vart er við öðru að búast en að tónleikagestir eigi eftir að skemmta sér vel á tónleikunum sem fram fara í Grafarvogskirkju klukkan 17 sunnudaginn 6. desember nk. Verði aðgöngumiða er stillt í hóf og rétt er að taka fram að eldri borgarar fá helmingsafslátt af miðaverði við innganginn.

Deila:

Fleiri fréttir

Arndís og Sigrún tilnefndar til ALMA-verðlaunanna 2027

Það er gleðiefni að tveir höfundar Forlagsins, Arndís Þórarinsdóttir og Sigrún Eldjárn, eru tilnefndar til alþjóðlegu ALMA-verðlaunanna 2027. Tilnefningarnar eru viðurkenning á framlagi þeirra til barna- og ungmennabókmennta. ALMA-verðlaunin, Astrid Lindgren Memorial Award, eru kennd við sænska barnabókahöfundinn Astrid Lindgren og veitt árlega einstaklingi eða stofnun fyrir mikilvægt framlag til barnabókmennta. Að þessu sinni eru…

Síðasti dagurinn hlýtur Sólfaxa – íslensku barnabókaverðlaunin 2026

Síðasti dagurinn eftir Matthildi Yrsu Sigurðardóttur, Þórunni Rakel Gylfadóttur og Diddu Flygenring hefur hlotið Sólfaxa – íslensku barnabókaverðlaunin árið 2026 Sólfaxi – íslensku barnabókaverðlaunin eru veitt fyrir handrit að myndríkri bók. Samkeppnin er nafnlaus og senda þátttakendur gögn inn undir dulnefni. Metþátttaka var í keppninni að þessu sinni en rúmlega fimmtíu handrit bárust. Eftir að…

Nýjar raddir 2027

Forlagið efnir í tíunda skipti til handritasamkeppni undir heitinu Nýjar raddir. Óskað er eftir handritum eftir höfunda sem ekki hafa gefið út fleiri en eitt prósaverk áður hjá atvinnuforlagi. Handritið skal vera á íslensku og einn samfelldur texti eða safn styttri texta og á lengd við nóvellu eða stutta skáldsögu (um 15.000 til 30.000 orð),…

Stjörnu-Sævar og Villi Neto ræða sólmyrkva í Bókahillunni

Í nýjasta þætti Bókahillunnar, hlaðvarps Forlagsins um bækur, höfunda og bókmenntir, ræðir Villi Neto við Stjörnu-Sævar um sólmyrkva. Þeir fara um víðan völl og ræða meðal annars frægðina, geimverur, teiknimyndir og auðvitað sólmyrkva. Sævar segir frá því hvernig best sé að undirbúa sig fyrir sólmyrkva og fylgjast með honum á öruggan hátt. Í þættinum segir…

Karfan þín

Valmynd