Taktu góða kilju út í sumarið!

  • Höfundur: Ritstjórn Forlagsins
Mamma segir

Það er ekkert lát á útgáfu hér í herbúðum Forlagsins en í dag dreifum við þremur spánýjum og spennandi kiljum. Hér er eitthvað við allra hæfi!

Í Uppreisn eftir Jakob Ejersbo fléttast saman margar sögur sem eiga sér þó sameiginlegan, sáran undirtón. Sofie er hálfdönsk og hálfgrænlensk en hún hafnar eftir ævintýralegum krókaleiðum í Afríku. Við hittum fyrir indverskættaðar stúlkur í járngreipum hefða, kynnumst skelfilegum aðstæðum í námum þar sem mannslífið er einskis metið og rótlausum ungmennum í heimi spillingar og misnotkunar þar sem allt snýst um að lifa af. Frásögnin er nöpur og miskunnarlaus og sker inn að beini.

Uppreisn er önnur bókin í þríleik Jakobs Ejersbo um mannlíf í Afríku og eftirköst nýlendutímans og persónur úr fyrstu bókinni, Útlaga, koma við sögu. Sagnabálkurinn hefur vakið mikla athygli og verið þýddur á fjölmörg tungumál enda þykir hann opna einstæða sýn á álfuna. Páll Baldvin Baldvinsson þýddi.

SMELLTU HÉR TIL ÞESS AÐ LESA BROT ÚT UPPREISN

Í glæpasögunni Piparkökuhúsinu eftir nýjan höfund, Carin Gerhardsen, snýr gömul kona sem býr ein heim í hús sitt eftir langa sjúkrahúsvist. Á eldhúsgólfinu liggur lík af manni sem hún þekkir ekki en reynist vera vammlaus fjölskyldufaðir úr hverfinu. Hver hefur orðið honum að bana og hvers vegna? Lögregluforinginn Conny Sjöberg og undirmenn hans á Hammarbystöðinni standa á gati – og svo fjölgar morðunum og tengsl koma í ljós. En hver ber þyngsta sektarbyrði – sá sem fremur verknað, sá sem hvetur til hans, sá sem rís upp til hefnda eða sá sem horfir aðgerðalaus á?

Carin Gerhardsen þekkir einelti af eigin raun. Hún er stærðfræðingur og starfaði við ráðgjöf á sviði veflausna þar til hún sló í gegn með Piparkökuhúsinu. Hún hefur síðan sent frá sér fleiri vinsælar bækur um lögreglusveitina á Hammarbystöðinni. Nanna B. Þórsdóttir þýddi.

SMELLTU HÉR TIL AÐ LESA BROT ÚT PIPARKÖKUHÚSINU

Mamma segir frá ungri stúlku sem heldur heim á prestssetrið til pabba síns þegar kærastan segir henni upp. Hún reynir hvað hún getur að átta sig á eðli ástarinnar og hlusta á fólkið sitt, vinkonuna og spunameistarann Mulle, lækninn þolinmóða með fráleitu hugmyndirnar, móðurina sem talar í slagorðum og hugsar ekki um annað en sextugsafmælið sem nálgast og föðurinn sem vitnar í Pink Floyd og trúir því að allt leysist af sjálfu sér.

Mamma segir er fyndin og sjarmerandi saga um ást, ástarsorg og meiri ást sem var stjörnum prýdd í fjölmiðlum í Danmörku þegar hún kom út árið 2012 og prentuð hvað eftir annað. Steinunn Stefánsdóttir þýddi.

SMELLTU HÉR TIL AÐ LESA BROT ÚT MAMMA SEGIR

Farðu með góða kilju út í sumarið!

Deila:

Fleiri fréttir

Arndís og Sigrún tilnefndar til ALMA-verðlaunanna 2027

Það er gleðiefni að tveir höfundar Forlagsins, Arndís Þórarinsdóttir og Sigrún Eldjárn, eru tilnefndar til alþjóðlegu ALMA-verðlaunanna 2027. Tilnefningarnar eru viðurkenning á framlagi þeirra til barna- og ungmennabókmennta. ALMA-verðlaunin, Astrid Lindgren Memorial Award, eru kennd við sænska barnabókahöfundinn Astrid Lindgren og veitt árlega einstaklingi eða stofnun fyrir mikilvægt framlag til barnabókmennta. Að þessu sinni eru…

Síðasti dagurinn hlýtur Sólfaxa – íslensku barnabókaverðlaunin 2026

Síðasti dagurinn eftir Matthildi Yrsu Sigurðardóttur, Þórunni Rakel Gylfadóttur og Diddu Flygenring hefur hlotið Sólfaxa – íslensku barnabókaverðlaunin árið 2026 Sólfaxi – íslensku barnabókaverðlaunin eru veitt fyrir handrit að myndríkri bók. Samkeppnin er nafnlaus og senda þátttakendur gögn inn undir dulnefni. Metþátttaka var í keppninni að þessu sinni en rúmlega fimmtíu handrit bárust. Eftir að…

Nýjar raddir 2027

Forlagið efnir í tíunda skipti til handritasamkeppni undir heitinu Nýjar raddir. Óskað er eftir handritum eftir höfunda sem ekki hafa gefið út fleiri en eitt prósaverk áður hjá atvinnuforlagi. Handritið skal vera á íslensku og einn samfelldur texti eða safn styttri texta og á lengd við nóvellu eða stutta skáldsögu (um 15.000 til 30.000 orð),…

Stjörnu-Sævar og Villi Neto ræða sólmyrkva í Bókahillunni

Í nýjasta þætti Bókahillunnar, hlaðvarps Forlagsins um bækur, höfunda og bókmenntir, ræðir Villi Neto við Stjörnu-Sævar um sólmyrkva. Þeir fara um víðan völl og ræða meðal annars frægðina, geimverur, teiknimyndir og auðvitað sólmyrkva. Sævar segir frá því hvernig best sé að undirbúa sig fyrir sólmyrkva og fylgjast með honum á öruggan hátt. Í þættinum segir…

Karfan þín

Valmynd