Gómsæt gulrótarsúpa úr Pottur, panna og Nanna

  • Höfundur: Ritstjórn Forlagsins
Pottur, panna og Nanna - uppskrift

Prófaðu þessa bragðgóðu síðsumars-súpu úr nýjustu matreiðslubókinni hennar Nönnu Rögnvaldardóttur, Pottur, panna og Nanna, sem kemur út í lok ágúst.
Þetta er súpa sem kitlar öll skilningarvit!

Gulrótarsúpa

1 kg gulrætur
1 laukur
2 hvítlauksgeirar
2½ msk ólífuolía
1 tsk kóríanderduft
pipar
salt
700 ml vatn, eða eftir þörfum
2 tsk grænmetiskraftur
½ tsk túrmerik
250 ml rjómi
2 msk salthnetur
1 msk graskersfræ
(einnig má nota önnur fræ og hnetur)
e.t.v ferskt óreganó eða aðrar kryddjurtir
eftir smekk

Hitaðu ofninn í 200°C. Flysjaðu gulræturnar og skerðu þær í sneiðar. Saxaðu laukinn og hvítlaukinn. Settu þetta í steypujárnspott ásamt ólífuolíu, kóríanderdufti, pipar og salti og hrærðu þar til gulræturnar eru þaktar olíu. Settu pottinn í ofninn, án loks, og bakaðu gulræturnar í 40–45 mínútur. Hrærðu í
þeim þegar tíminn er u.þ.b. hálfnaður. Taktu pottinn úr ofninum og settu hann á eldavélarhellu. Helltu vatninu yfir gulræturnar og hrærðu grænmetiskrafti og túrmeriki saman við. Láttu malla í um 10 mínútur. Taktu pottinn svo af hitanum og láttu súpuna kólna í nokkrar mínútur. Helltu henni svo í matvinnsluvél, e.t.v. í 2–3 skömmtum, og maukaðu hana vel. Einnig má nota töfrasprota. Taktu 2–3 msk af rjóma frá en hrærðu afganginum saman við súpuna, helltu henni aftur í pottinn og hitaðu hana að suðu. Smakkaðu og bragðbættu með pipar og salti eftir smekk – það er gott að pipra súpuna vel.

Berðu súpuna fram í pottinum eða í skál og stráðu salthnetum, graskersfræjum og kryddjurtum yfir. Dreyptu afganginum af rjómanum yfir súpuna í mjórri bunu eða í dropatali.

Verði þér að góðu!

Deila:

Fleiri fréttir

Arndís og Sigrún tilnefndar til ALMA-verðlaunanna 2027

Það er gleðiefni að tveir höfundar Forlagsins, Arndís Þórarinsdóttir og Sigrún Eldjárn, eru tilnefndar til alþjóðlegu ALMA-verðlaunanna 2027. Tilnefningarnar eru viðurkenning á framlagi þeirra til barna- og ungmennabókmennta. ALMA-verðlaunin, Astrid Lindgren Memorial Award, eru kennd við sænska barnabókahöfundinn Astrid Lindgren og veitt árlega einstaklingi eða stofnun fyrir mikilvægt framlag til barnabókmennta. Að þessu sinni eru…

Síðasti dagurinn hlýtur Sólfaxa – íslensku barnabókaverðlaunin 2026

Síðasti dagurinn eftir Matthildi Yrsu Sigurðardóttur, Þórunni Rakel Gylfadóttur og Diddu Flygenring hefur hlotið Sólfaxa – íslensku barnabókaverðlaunin árið 2026 Sólfaxi – íslensku barnabókaverðlaunin eru veitt fyrir handrit að myndríkri bók. Samkeppnin er nafnlaus og senda þátttakendur gögn inn undir dulnefni. Metþátttaka var í keppninni að þessu sinni en rúmlega fimmtíu handrit bárust. Eftir að…

Nýjar raddir 2027

Forlagið efnir í tíunda skipti til handritasamkeppni undir heitinu Nýjar raddir. Óskað er eftir handritum eftir höfunda sem ekki hafa gefið út fleiri en eitt prósaverk áður hjá atvinnuforlagi. Handritið skal vera á íslensku og einn samfelldur texti eða safn styttri texta og á lengd við nóvellu eða stutta skáldsögu (um 15.000 til 30.000 orð),…

Stjörnu-Sævar og Villi Neto ræða sólmyrkva í Bókahillunni

Í nýjasta þætti Bókahillunnar, hlaðvarps Forlagsins um bækur, höfunda og bókmenntir, ræðir Villi Neto við Stjörnu-Sævar um sólmyrkva. Þeir fara um víðan völl og ræða meðal annars frægðina, geimverur, teiknimyndir og auðvitað sólmyrkva. Sævar segir frá því hvernig best sé að undirbúa sig fyrir sólmyrkva og fylgjast með honum á öruggan hátt. Í þættinum segir…

Karfan þín

Valmynd