Sigrún Eldjárn sendir í ár frá sér Náttúrugripasafnið, þykka bók í handhægu broti þar sem hver furðuatburðurinn rekur annan svo lesendur fá sífellt eitthvað nýtt að hugsa um. Bókin er sjálfstætt framhald Forngripasafnsins sem kom út í fyrra og Sigrún fer ekki leynt með að á næsta ári verði þríleiknum lokað með Listasafninu.
Í dómi sínum á Bókmenntavefnum í dag fagnar María Bjarkadóttir nýjustu sögu Sigrúnur og segir meðal annars: „Sögur Sigrúnar Eldjárn hafa fylgt íslenskum börnum í gegnum undanfarna áratugi og varla sú manneskja til sem þekkir ekki eitthvað af verkum hennar. Sigrún er þeim kostum gædd sem rithöfundur að geta haldið áfram ár eftir ár að skrifa bækur, sem verða þó aldrei endurtekningarsamar heldur eru alltaf jafn innblásnar og hugmyndaríkar. Frásagnargleði og virðing fyrir lesandanum ræður ríkjum og klikkar ekki nú frekar en fyrri daginn.“
Lesendur Sigrúnar fyrr og síðar, hvort sem þeir eru tíu ára eða fimmtugir, geta sannarlega tekið undir þetta!





