Linda tilnefnd til barnabókmenntaverðlauna í Þýskalandi

  • Höfundur: Ritstjórn Forlagsins

Rit- og myndhöfundurinn Linda Ólafsdóttir hefur verið tilnefnd til Þýsku barnabókmenntaverðlaunanna, Deutschen Jugendliteraturpreis, 2025 fyrir bók sína Ég þori! Ég get! Ég vil! Þegar íslenskar konur höfðu svo hátt að allur heimurinn heyrði í þeim. Bókin er myndlýst saga um kvennafrídaginn árið 1975, daginn sem konur gengu út af heimilum sínum, skólum og vinnustöðum og kröfðust jafnréttis og breytinga.

Tilnefningarnar voru tilkynntar á nýafstaðinni bókamessu í Leipzig og á bókamessunni í Frankfurt í október kemur í ljós hverjir hljóta verðlaunin sem þykja þau virtustu í Þýskalandi. Þýska útgáfan af bókinni um kvennafrídaginn er tilnefnd í flokki sögutengdra bóka.

Í umsögn dómnefndar segir: Linda Ólafsdóttir fjallar á áhrifaríkan og aðgengilegan hátt um kvenréttindamál. Hún vekur með bók sinni næmni barna fyrir jafnrétti og félagslegu réttlæti og styrkir réttlætiskennd þeirra. Linda útskýrir á skýran og kröftugan hátt mikilvæga félagslega hreyfingu sem hefur haft áhrif á heiminn og undirstrikar mikilvægi lýðræðislegrar þátttöku í samfélaginu. Anna Schaub hefur þýtt bókin afbragðsvel úr ensku.“

Der Tag, als die Frauen streikten var gefin út af þýska forlaginu Prestel en bókin kom upphaflega út hjá Forlaginu. Hún hefur auk þess komið út hjá Abrams Books í Bandaríkjunum og er japönsk þýðing jafnframt væntanleg síðar á árinu.

Auk tilnefningarinnar til Þýsku barnabókaverðlaunanna hefur Linda hlotið fjölda viðurkenninga fyrir bókina. Myndlýsingarnar voru valdar inn á hina virtu sýningu Society of Illustrators í New York og einnig inn á barnabókamessuna í Bologna á Ítalíu. Nýlega hlaut bókin einnig Septima P. Clark Women in Literature Book Award, verðlaun sem tileinkuð eru framúrskarandi bókum fyrir börn og ungmenni um afrek kvenna. „Ég er virkilega stolt og þakklát fyrir þessa viðurkenningu”, segir Linda Ólafsdóttir. „Að vera tilnefnd til þessara verðlauna úr hópi svo margra öflugra rit- og myndhöfunda er mér mjög mikill heiður og þá sérstaklega fyrir bók um kvenréttindi og íslensku konurnar sem tóku sér frí fyrir fimmtíu árum síðan. Nú þegar við fögnum kvennaári og hálfrar aldar afmæli kvennafrídagsins þá vona ég auðvitað að hróður og hróp íslenskra kvenna heyrist sem víðast!“

Um Lindu Ólafsdóttur:

Linda Ólafsdóttir hefur myndlýst fjölda bóka, má þar nefna Íslandsbók barnanna, Reykjavík barnanna, Einar, Anna og safnið sem var bannað börnum, Draumaþjófinn og hennar eigin höfundaverk, bókina um kvennafrídaginn, Ég þori! Ég get! Ég vil!, og Play? eða Leika?, en báðar bækurnar hafa komið út bæði í Bandaríkjunum og á Íslandi og hafa verið þýddar á fleiri tungumál. Linda myndlýsti bókina Mindi and the Goose eftir hinn heimsþekkta rithöfund Sam McBratney en hún er gefin út af Walker Books og Candlewick.

Linda hefur hlotið fjölda viðurkenninga og verðlauna fyrir verk sín. Hún hefur tvisvar verið tilnefnd til Íslensku bókmenntaverðlaunanna og verið sæmd Fjöruverðlaununum jafn oft auk þess sem hún hefur hlotið verðlaun Félags íslenskra teiknara og í þrígang Barnabókaverðlaun skóla- og frístundaráðs Reykjavíkur. Hún hefur tvisvar verið tilnefnd til Astrid Lindgren Memorial Awards og fyrir Íslandsbók barnanna hlaut hún heiðurssæti á heimslista IBBY.

Deila:

Fleiri fréttir

Arndís og Sigrún tilnefndar til ALMA-verðlaunanna 2027

Það er gleðiefni að tveir höfundar Forlagsins, Arndís Þórarinsdóttir og Sigrún Eldjárn, eru tilnefndar til alþjóðlegu ALMA-verðlaunanna 2027. Tilnefningarnar eru viðurkenning á framlagi þeirra til barna- og ungmennabókmennta. ALMA-verðlaunin, Astrid Lindgren Memorial Award, eru kennd við sænska barnabókahöfundinn Astrid Lindgren og veitt árlega einstaklingi eða stofnun fyrir mikilvægt framlag til barnabókmennta. Að þessu sinni eru…

Síðasti dagurinn hlýtur Sólfaxa – íslensku barnabókaverðlaunin 2026

Síðasti dagurinn eftir Matthildi Yrsu Sigurðardóttur, Þórunni Rakel Gylfadóttur og Diddu Flygenring hefur hlotið Sólfaxa – íslensku barnabókaverðlaunin árið 2026 Sólfaxi – íslensku barnabókaverðlaunin eru veitt fyrir handrit að myndríkri bók. Samkeppnin er nafnlaus og senda þátttakendur gögn inn undir dulnefni. Metþátttaka var í keppninni að þessu sinni en rúmlega fimmtíu handrit bárust. Eftir að…

Nýjar raddir 2027

Forlagið efnir í tíunda skipti til handritasamkeppni undir heitinu Nýjar raddir. Óskað er eftir handritum eftir höfunda sem ekki hafa gefið út fleiri en eitt prósaverk áður hjá atvinnuforlagi. Handritið skal vera á íslensku og einn samfelldur texti eða safn styttri texta og á lengd við nóvellu eða stutta skáldsögu (um 15.000 til 30.000 orð),…

Stjörnu-Sævar og Villi Neto ræða sólmyrkva í Bókahillunni

Í nýjasta þætti Bókahillunnar, hlaðvarps Forlagsins um bækur, höfunda og bókmenntir, ræðir Villi Neto við Stjörnu-Sævar um sólmyrkva. Þeir fara um víðan völl og ræða meðal annars frægðina, geimverur, teiknimyndir og auðvitað sólmyrkva. Sævar segir frá því hvernig best sé að undirbúa sig fyrir sólmyrkva og fylgjast með honum á öruggan hátt. Í þættinum segir…

Karfan þín

Valmynd