Um bókina
Í Þjóðskjalasafni Íslands eru skjöl sem spanna þúsund ára sögu landsins. Elsta skjalið sem þar er varðveitt er Reykholtsmáldagi, en hluti hans er talinn ritaður á síðari hluta 12. aldar. Það er jafnframt elsta þekkta skjalið sem ritað hefur verið á íslensku. Yngstu skjölin eru stafræn gögn frá síðustu árum. Hlutverk safnsins er að tryggja varðveislu skjalanna, hvort sem þau eru rituð á skinn, pappír eða á stafrænu formi. Þessi bók er sýnisbók skjala sem varðveitt eru í Þjóðskjalasafni Íslands og er hún sameiginlegt verkefni starfsfólks þess. Skjölin sem varðveitt eru í safninu geyma sögu heillar þjóðar, sögu einstaklinga sem þurftu að takast á við lífsbaráttuna, og í þeirri baráttu urðu til mörg þeirra skjala sem hafa varðveist. Þar er að finna hvers kyns gögn sem rekja ævi fólks frá vöggu til grafar. Þau eru óþrjótandi uppspretta þekkingar um öll lög samfélagsins og eru aðgengileg bæði fræðimönnum og almenningi.
