Þú ert hér://Arnaldur Indriðason
Arnaldur Indriðason

Arnaldur Indriðason

Arnaldur Indriðason er fæddur 28. janúar 1961. Hann lauk BA-prófi í sagnfræði frá Háskóla Íslands og starfaði við blaðamennsku um hríð. Árið 1997 sendi hann frá sér sína fyrstu skáldsögu, Syni duftsins, og æ síðan hefur ný saga komið frá honum á ári hverju. Fyrstu bókunum var vel tekið en segja má að Arnaldur hafi fyrst slegið í gegn, bæði heima og erlendis, með fjórðu skáldsögu sinni, Mýrinni, sem kom út árið 2000. Eftir henni var gerð samnefnd kvikmynd nokkrum árum síðar. Frá því að Mýrin kom út hefur hver einasta bók Arnaldar orðið metsölubók hér á landi og margar þeirra hafa sömuleiðis komist á metsölulista í öðrum löndum, ekki síst í Frakklandi þar sem hann nýtur gríðarlegra vinsælda.

Bækur Arnaldar eru glæpasögur þar sem fjallað er af næmi og skilningi um gjörðir og tilfinningar sögupersónanna og þau samfélagsmein sem iðulega búa að baki afbrotum. Sögufléttan er jafnan traust, persónusköpun sterk og stíllinn knappur. Í bókunum eru oft dregnar upp skýrar myndir úr fortíðinni og ósjaldan liggja leyndir þræðir milli atburða í samtíð og fortíð – þekking á sögunni er mikilvægur þáttur í sagnaheimi höfundarins. Margar af vinsælustu sögum Arnaldar fjalla um rannsóknir Erlendar Sveinssonar og samstarfsmanna hans á lögreglustöðinni við Hverfisgötu, en í annarri bókaröð segir frá þeim Flóvent og Thorson sem starfa saman að lögreglurannsóknum í Reykjavík á árum síðari heimsstyrjaldar. Nokkrar bækur höfundar standa líka stakar og ótengdar öðrum.

Arnaldur hefur hlotið fjöldamörg verðlaun og viðurkenningar á ferlinum. Má þar nefna virt verðlaun samtaka breskra glæpasagnahöfunda, Gullrýtinginn, og norrænu glæpasagnaverðlaunin Glerlykilinn, sem hann fékk í tvígang. Einnig hefur hann hlotið þekkt bókmenntaverðlaun á Spáni, í Frakklandi margsinnis, í Svíþjóð, Finnlandi og víðar, að ógleymdum tilnefningum til ótal annarra verðlauna, þar á meðal Íslensku bókmenntaverðlaunanna. Bækur hans hafa komið út á um fjörutíu tungumálum um víða veröld og selst í tugmilljónatali. Enginn íslenskur höfundur nýtur meiri velgengni og vinsælda heima og heiman, og enginn hefur heldur skrifað jafn margar skáldsögur síðastliðna tvo áratugi.