Arndís Þórarinsdóttir er fædd árið 1982. Hún er með BA-próf í almennri bókmenntafræði frá Háskóla Íslands og MA-próf í ritlist frá Goldsmiths College, University of London, og Háskóla Íslands.

Arndís skrifar bæði fyrir börn og fullorðna og hefur hlotið fjölmargar viðurkenningar fyrir verk sín. Árið 2020 var hún tilnefnd til Íslensku bókmenntaverðlaunanna í flokki skáldverka fyrir ljóðabók sína Innræti. Ári síðar hlaut hún tilnefningu til sömu verðlauna í flokki barna- og ungmennabóka fyrir Bál tímans en sú bók var jafnframt tilnefnd til Barnabókaverðlauna Reykjavíkurborgar og Barna- og unglingabókmenntaverðlauna Norðurlandaráðs. Kollhnís, sem kom út árið 2022, hlaut Íslensku bókmenntaverðlaunin, Fjöruverðlaunin og Barnabókaverðlaun Reykjavíkurborgar og var tilnefnd til Barna- og unglingabókmenntaverðlauna Norðurlandaráðs.

Arndís hefur auk þess skrifað tvær barnabækur í félagi við Huldu Sigrúnu Bjarnadóttur. Sú fyrri, Blokkin á heimsenda, hlaut Barnabókaverðlaun Guðrúnar Helgadóttur og Íslensku bókmenntaverðlaunin í flokki barna- og ungmennabóka en hún var auk þess tilnefnd til Barnabókaverðlauna Reykjavíkur og Barna- og unglingabókmenntaverðlauna Norðurlandaráðs. Jafnframt var þýsk þýðing bókarinnar tilnefnd til Þýsku barnabókaverðlaunanna (Deutschen Jugendliteraturpreis ) árið 2024 í flokki skáldverka fyrir börn. Önnur barnabók Arndísar og Huldu, Mömmuskipti, var tilnefnd til Íslensku bókmenntaverðlaunanna 2023 og Barnabókaverðlauna Reykjavíkurborgar. Árið 2025 kom út fyrsta bók Arndísar og Huldu fyrir fullorðna, gamansama glæpasagan Morð og messufall.

Verk Arndísar hafa komið út í Danmörku, Eistlandi, Finnlandi, Hollandi, Ítalíu, Rússlandi, Spáni, Þýskalandi og Tékklandi og þýðingar á ungversku, frönsku, kínversku og makedónsku eru væntanlegar.

Arndís hefur jafnframt fengist við ýmiss konar þýðingar.