Þú ert hér://Auður Jónsdóttir
Auður Jónsdóttir

Auður Jónsdóttir

Auður Jónsdóttir er fædd 30. mars 1973. Hún starfar sem rithöfundur og sjálfstæður blaðamaður og hefur skrifað greinar og viðtöl fyrir ýmis tímarit og dagblöð.  Smásaga hennar „Gifting“ sem birtist í tímaritinu Andblæ haustið 1997 var fyrsta verk hennar skáldskaparkyns sem birtist á prenti.

Auður er fjölhæfur höfundur og hefur skrifað skáldverk bæði fyrir fullorðna og börn auk þess sem hún tekur virkan þátt í þjóðlífinu með beittum pistlum sínum. Hún nýtir eigin lífsreynslu á frjóan og skemmtilegan hátt í verkum sínum. Það á ekki síst við um skáldsöguna Ósjálfrátt (2012) sem lýsir leið stúlkunnar Eyju til skáldskapar. Bækur hennar hafa notið mikillar hylli lesenda og gagnrýnenda allt frá fyrstu tíð.

Auður hefur hlotið ýmsar viðurkenningar fyrir skáldverk sín. Fyrsta skáldsaga hennar, Stjórnlaus lukka (1998) var tilnefnd til Íslensku bókmenntaverðlaunanna, einnig skáldsögurnar Tryggðarpantur (2006) og Stóri skjálfti (2015), og fyrir Fólkið í kjallaranum (2004) hlaut hún þau verðlaun. Árið 2002 gaf hún út bókina Skrýtnastur er maður sjálfur sem hún skrifaði um afa sinn, Halldór Laxness, fyrir börn. Sú bók var líka tilnefnd til Íslensku bókmenntaverðlaunanna og  hlaut viðurkenningu Upplýsingar, félags íslenskra bókasafnsfræðinga sem vel unnið fræðirit fyrir börn. Hún var jafnframt kosin barnabók ársins í kosningu íslenskra bóksala. Fleiri bækur Auðar hafa hreppt sæti á listum þeirra í gegnum árin. Fyrir skáldsöguna Ósjálfrátt hlaut hún Fjöruverðlaunin 2012 og Menningarverðlaun DV sama ár. Skáldsagan Stóri skjálfti hlaut viðurkenningu starfsfólks bókaverslana sem besta íslenska skáldsagan 2015.

Fólkið í kjallaranum var tilnefnd af Íslands hálfu til Bókmenntaverðlauna Norðurlandaráðs 2006 og Ósjálfrátt til sömu verðlauna 2013. Bækur Auðar hafa komið út í ýmsum löndum og hlotið góðar viðtökur.

Smelltu hér til að skoða heimasíðu Auðar.