Benný Sif Ísleifsdóttir (f. 1970) er með MA-próf í þjóðfræði auk BA-gráðu í þjóðfræði og diplóma í hagnýtri íslensku frá Háskóla Íslands. Hún hlaut nýræktarstyrk Miðstöðvar íslenskra bókmennta 2018 fyrir handritið að skáldsögunni Grímu sem kom út sama ár. Gríma vakti nokkra athygli, spurðist vel út meðal lesenda og hlaut Íslensku hljóðbókaverðlaunin. Skáldsagan Hansdætur kom út árið 2020 og hlaut strax mikið lof gagnrýnenda og var tilnefnd til Evrópsku bókmenntaverðlaunanna en þráður Gratíönu Hansdóttur var tekinn upp í skáldsögunni Gratíana árið 2022. Benný hefur einnig skrifað þrjár barnabækur: Jólasveinarannsóknin (2018), Álfarannsóknin (2019) og Einstakt jólatré (2023) ásamt teiknaranum Linn Janssen.

Benný kom nokkuð geyst fram á íslenskt bókmenntasvið og hefur á tæpum áratug markað sér spor þar með sex skáldsögum, sú síðasta, Vetrarþrestir, kom út haustið 2026. Skáldsögur hennar eru örlagasögur fólks úr íslenskum veruleika, höfundur tvinnar haganlega saman sorgir og sigra sögupersónanna og lesandinn getur vart annað en hrifist með.