Björn Halldórsson er fæddur árið 1983 og ólst upp í Mosfellsbæ. Hann er með BA-gráðu í enskum og amerískum bókmenntum frá háskóla Austur-Anglia-héraðs í Norwich á Englandi og MFA-gráðu í ritlist frá háskólanum í Glasgow, þar sem hann kenndi einnig ritlist og tók þátt í bókmenntahátíð Glasgow-borgar, AyeWrite! Auk skáldskapar hefur Björn stundað þýðingar og skrifað pistla, gagnrýni og greinar fyrir ýmis blöð og útgáfur heima og erlendis. Hann hefur einnig tekið þátt í og stýrt viðburðum á ensku og íslensku, meðal annars fyrir Bókmenntahátíð í Reykjavík og PEN World Voices-bókmenntahátíðina í New York-borg, þar sem hann bjó á árunum 2016–2019. Sögur og ritgerðir Björns hafa birst í bókmenntatímaritum á Íslandi og í Skotlandi og verið þýddar á ensku, þýsku, ítölsku og hebresku. Fyrsta bók hans, smásagnasafnið Smáglæpir, kom út árið 2017 og var afar vel tekið. Fyrir hana hlaut hann Nýræktarstyrk Miðstöðvar íslenskra bókmennta. Næsta bók hans, skáldsagan Stol, kom út snemma árs 2021.