Ísak Harðarson fæddist í Reykjavík 1956. Hann lauk stúdentsprófi 1977 og stundaði síðan nám við Kennaraháskóla Íslands auk íslenskunáms við Háskóla Íslands. Fyrsta bók hans, ljóðabókin Þriggja orða nafn, kom út árið 1982. Í kjölfarið fylgdu margar fleiri ljóðabækur, smásagnasöfn, skáldsaga og endurminningabók. Ljóð hans komu einnig út í safnritinu Ský fyrir ský árið 2000. Ísak samdi söngtexta og ljóð hans hafa verið flutt með tónlist, þá hafa ljóð eftir hann birst í erlendum tímaritum og sýnisbókum. Ísak var um árabil ötull þýðandi og þýddi fjölda bóka úr ensku og Norðurlandamálum á íslensku. Ljóð og sögur Ísaks vöktu athygli frá fyrstu tíð og fengu mikið lof. Hann hlaut verðlaun úr Rithöfundasjóði Ríkisútvarpsins og árið 2011 var tíunda ljóðabók hans, Rennur upp um nótt, tilnefnd til Bókmenntaverðlauna Norðurlandaráðs. Ísak lést í maí árið 2023 og lét þá eftir sig handrit að ljóðaúrvali sem kom út um haustið undir heitinu Ró í beinum. Ljóð Ísaks eru iðulega djúphugul, trúarleg og heimspekileg, lýsa stundum örvæntingu og einmanaleika en geyma einnig óvæntar myndir og kraftmikinn gáska. Hið sama má segja um önnur skrif hans, til að mynda sögurnar í seinustu frumsömdu bók hans, smásagnasafni sem nefnist Hitinn á vaxmyndasafninu og kom úr 2021.