Ragna Sigurðardóttir rithöfundur, myndlistarmaður og þýðandi er fædd árið 1962. Hún lærði myndlist við Myndlista- og handíðaskóla Íslands og hélt eftir útskrift í framhaldsnám til Hollands. Um skeið bjó hún í Danmörku og starfaði sem myndlistargagnrýnandi í áratug.

Ragna hefur skrifað á annan tug bóka. Hún hóf ritferil sinn á stuttum prósastykkjum og ljóðum, myndrænum og stundum myndskreyttum. Árið 1987 gaf hún út bókverkið Stefnumót, ljóðabókin Fallegri en flugeldar kom út 1989 og prósaljóðabókin 27 herbergi árið 1991. Árið 1993 kom fyrsta skáldsaga Rögnu út, Borg, en hún var tilnefnd til Íslensku bókmenntaverðlaunanna.