Þórarinn Eldjárn er fæddur í Reykjavík 1949. Hann stundaði nám í bókmenntum, heimspeki og íslensku við Háskóla Íslands og Háskólann í Lundi, en hann var búsettur í Svíþjóð um nokkrurra ára skeið. Þórarinn á að baki langan og farsælan höfundarferil en fyrsta ljóðabók hans, Kvæði, kom út árið 1974. Hann vakti strax mikla athygli og hefur frá fyrstu tíð verið eitt ástsælasta skáld þjóðarinnar; bækur hans, sem skipta tugum, hafa jafnan notið mikillar hylli lesenda. Þórarinn er gríðarlega fjölhæfur og hefur sent frá sér verk í flestum greinum bókmennta: ljóðabækur í hefðbundnu formi og frjálsu, smásagnasöfn, skáldsögur, söguleg verk, leikrit og barnaljóð, auk þess sem hann hefur verið afkastamikill þýðandi og samið fjölda söngtexta. Þórarinn hefur skýra sérstöðu meðal íslenskra skálda. Auk fjölhæfninnar er hann þekktastur fyrir glímu sína við hefðbundið ljóðform en einnig hefur vakið athygli hvernig hann vinnur úr íslenskum menningararfi með ísmeygilegri gamansemi sem tíðum reynist egghvöss þegar vel er að gáð. Hann er einstaklega orðhagur, jafnvígur á ljóð og laust mál og höfðar jafnt til barna sem fullorðinna. Meðal viðurkenninga Þórarins fyrir ritstörf má nefna viðurkenningu Sænsku akademíunnar fyrir kynningu á sænskri menningu erlendis (2013), Bókmenntaverðlaun starfsfólks bókaverslana fyrir barnabækurnar Ljóðpundara (2018), Árstíðirnar (2010) og Gælur, fælur og þvælur (2007) og fyrir ljóðabókina Hættur og mörk (2005), Barnabókaverðlaun Reykjavíkurborgar fyrir bækurnar Óðfluga ((1992) og Halastjarna (1998) og svo mætti áfram telja. Þá hlaut hann Verðlaun Jónasar Hallgrímssonar 1998 og var útnefndur borgarlistamaður Reykjavíkur árið 2008. Bók hans og Sigrúnar Eldjárn, Fuglaþrugl og naflakrafl, var tilnefnd til Íslensku bókmenntaverðlaunanna 2014 og þýðingar Þórarins á leikritum Shakespeares, Lé konungi, Jónsmessunæturdraumi og Hamlet, voru allar tilnefndar til Íslensku þýðingaverðlaunanna. Þá var skáldsaga hans, Brotahöfuð frá 1997, tilnefnd til írsku IMPAC-verðlaunanna, Bókmenntaverðlauna Norðurlandaráðs og Aristeion, evrópsku bókmenntaverðlaunanna.