Valdimar Tómasson fæddist árið 1971 í Mýrdal. Hann flutti til Reykjavíkur 16 ára gamall og hefur sinnt ýmiss konar afgreiðslu- og þjónustustörfum. Valdimar er jafnframt mikilvirkt ljóðskáld en hann kvaddi sér fyrst hljóðs með bókinni Enn sefur vatnið sem kom út árið 2007. Síðan hafa sex bækur bæst við: Sonnettugeigur (2013), Dvalið við dauðalindir (2017), Vetrarland (2018), Veirufangar og veraldarharmur (2022), Blástjarna efans (2022) og Söngvar til sársaukans (2024). Árið 2019 kom auk þess út ljóðasafnið Ljóð 2007−2018 en það hefur að geyma fyrstu fjórar bækurnar. Stíll Valdimars er meitlaður og knappur en í ljóðum sínum fæst hann gjarnan við myrkari hliðar tilverunnar; einsemd, söknuð og dauðabeyg.