Höfundur: Marie Darrieussecq

Sjaldan hefur byrjendaverk slegið jafn rækilega í gegn og þessi fyrsta skáldsaga Marie Darrieussecq. Hún varð umsvifalaust metsölubók í Frakklandi þegar hún kom út árið 1996 og hefur nú farið sigurför um alla Evrópu. Gagnrýnendur hafa líkt bókinni við Hamskipti Kafka og Dýragarð Orwells; svartur húmorinn og heimsendastemningin minnir líka á kvikmyndir eins og Delicatessen.

Dæmisagan hér fer líka ekkert á milli mála. Þetta er saga um konu í karlveldi sem komið er fram við eins og svín uns hún breytist í svín, bókstaflega. Ung og atvinnulaus stúlka starfar við einhvers konar nudd á vinsælli snyrtistofu og þegar útlit hennar verður blómlegra, brjóstin stækka og litaraftið tekur á sig rósrauðan blæ verður hún vinsælastas stúlkan meðal karlgestanna. Og þótt hún fái ekki kaupið sitt nema með höppum og glöppum og þurfi að uppfylla hinar dularfyllstu þarfir þá er hún sæl og glöð.

En breytingarnar á henni halda áfram, hún fitnar, húðin verður æ grófari, viðskiptavinirnir gerast ruddalegri og kærastinn sífellt afundnari. Og þegar umbreytingin er um garð gengin og hún er orðin að gyltu er ekki um annað að ræða en að leita niður í holræsin, enda vargöld runninn upp  í París nálægrar framtíðar…