Gagnrýnandi sænska stórblaðsins Dagens Nyheter, Lotta Olsson, er með tvær íslenskar skáldsögur á lista sínum yfir bestu glæpasögur ársins í Svíþjóð. Þetta eru Furðustrandir eftir Arnald Indriðason (Den kalla elden á sænsku) og Tími nornarinnar eftir Árna Þórarinsson (Häxans tid á sænsku).
Þeir félagar eru í hópi úrvalshöfunda þar sem meðal annarra má sjá Jussi Adler-Olsen, Håkon Östlundh, Kristinu Ohlsson og Åsu Larsson. Svo segir Lotta að ekki megi maður gleyma uppphafinu, tíu bóka seríu Maj Sjöwall og Per Wahlöö sem var að koma út í nýrri útgáfu í Svíþjóð. Þrjár af bókum þeirra hafa verið endurútgefnar í kilju hjá Forlaginu á síðustu árum, Morðið á ferjunni, Maðurinn á svölunum og Maðurinn sem hvarf. Lotta nefnir einmitt tvær þær fyrrnefndu sem sínar eftirlætisbækur í þeirri seríu.
