Um þessar mundir heldur Þroskaþjálfafélag Íslands upp á 50 ára afmæli félagsins en það var stofnað 18. maí 1965 af sextán konum sem flestar unnu á Kópavogshæli og höfðu menntast í „gæslu og umönnun vangefinna“ eins og það hét í þá daga. Þá nefndust þær gæslusystur og svo var til árins 1972 þegar stéttin fékk nýtt heiti – þroskaþjálfar.

Á Kópavogshæli hófst saga stéttar sem síðan hefur starfað í þágu fatlaðs fólks á Íslandi, einkum fólks með þroskahömlun, og á sér fjölbreyttari starfsvettvang en flestar aðrar stéttir. Miklir sigrar hafa unnist á langri leið. Menntun þroskaþjálfa hefur tekið margvíslegum breytingum til að mæta kröfum hvers tíma og fer nú fram í Háskóla Íslands.