Handbók um ómerktar undankomuleiðir er ljóðsaga þar sem undirliggjandi atburðarás minnir á dramatíska og þó launfyndna óperu. Sagan lýsir annasömum degi hjá ónefndri persónu sem bregst við margvíslegum áreitum umhverfisins með því að ferðast í anda til annarra staða og stunda.

Stundum er eina leiðin
til að komast af
sú leið að koma sér undan í huganum.

Anton Helgi Jónsson gaf út sína fyrstu ljóðabók 1974, þá 19 ára, en alls eru ljóðabækurnar nú orðnar níu. Mál og menning hefur gefið þær flestar út, síðast bókina Tvífari gerir sig heimakominn 2014.

Nokkrar af bókum skáldsins eru enn fáanlegar hjá Forlaginu og er auðvelt að panta þær á vefnum forlagid.is en eldri bækurnar má lesa á vef skáldsins, anton.is, sem hefur einnig að geyma margvíslegt efni sem ekki hefur birst í bókum.