Fjórar megineldstöðvar skipa stóran sess á kortinu. Frá þeim hafa runnið nokkur nútímahraun. Auk þeirra koma hraun frá Langjökuls/Hveravalla og Bárðarbungu eldstöðvakerfunum við sögu. Móbergi frá jökulskeiðum er skipt í fjóra aldurshópa, en auk þess eru basalthraun og millilög frá hlýskeiðum áberandi. Jarðhiti er sýndur á kortinu ásamt helstu dráttum höggunar og jökulhörfunar.

Á bakhlið kortsins er bent á 23 valda áhugaverða skoðunarstaði, þar má nefna: Þjórsárver, Eyvindaver, Hveravelli, Vonarskarð og Kerlingarfjöll. Eins eru hopi ísaldarjökulsins af miðhálendinu gerð sérstök skil.

Jarðfræðingarnir Árni Hjartarson, Ingibjörg Kaldal, Kristján Sæmundsson, Magnús Á. Sigurgeirsson og Skúli Víkingsson unnu að gerð kortsins. Kortið byggist á fjölmörgum jarðfræðikortum í stærri mælikvarða, sem unnin hafa verið fyrir verkkaupa ÍSOR og forvera þeirra, Orkustofnun, og auk þess á eldri útgefnum yfirlitskortum. Kortin hafa verið einfölduð, endurskoðuð og nýjum upplýsingum bætt við.

Kortahönnuðir eru Albert Þorbergsson og Guðrún Sigríður Jónsdóttir.

Við útgáfu kortsins naut ÍSOR veglegs stuðnings Landsvirkjunar og Umhverfis- og auðlindaráðuneytisins.