Í þessu viðamiklu verki leiðir höfundur lesendur gegnum fyrstu öld ljósmyndunar á Íslandi af mikilli þekkingu. Saga ljósmyndunar í öllum sínum margbreytileika er sögð frá frumskeiði hennar um miðja 19. öld og fram til stríðsloka.

Til hagræðis fyrir erlenda lesendur hefur þessi bókarhluti verið þýddur á ensku.

Í sérstöku ljósmyndaratali er gefin mynd af öllum sjálfstætt starfandi ljósmyndurum á tímabilinu og birt vandað sýnishorn ljósmynda eftir hvern og einn þeirra.

Bókina prýða hátt á fimmta hundrað ljósmyndir sem sýna þróun ljósmyndunar og veita jafnframt fágæta sýn á þjóðina og sögu hennar. Allar myndir ljósmyndaranna eru birtar óbreyttar og í upprunalegum lit og margar þeirra hafa ekki áður birst á prenti.

Ljósmyndarar á Íslandi 1845–1945 er skrifuð af okkar helsta sérfræðing í ljósmyndasögu Ingu Láru Baldvinsdóttur, deildarstjóra myndadeildar Þjóðminjasafns Íslands.

Ljósmyndarar á Íslandi 1845–1945 er fræðirit á nýju sviði, ljósmyndasögu, sem lítt hefur verið sinnt hérlendis og ætti að höfða til allra áhugamanna um sögu landsins.