Þegar Matthildur vaknar að morgni 10. nóvember árið 2023 óttast hún það versta. Öflugir jarðskjálftar hafa skekið heimabæ hennar, Grindavík, dögum saman og eldgos vofir yfir. Matthildur reynir að lifa eðlilegu lífi, fara á fótboltaæfingu og hitta vinkonur, en áður en dagurinn er liðinn hefur fjölskyldan flúið bæinn í ofboði.

Síðasti dagurinn fjallar um atburði sem greyptir eru í minni þjóðarinnar en er sjaldan fjallað um frá sjónarhóli barna. Matthildur Yrsa Sigurðardóttir var ellefu ára þegar náttúruhamfarirnar í Grindavík hófust en hér segir hún frá reynslu sinni í samvinnu við Þórunni Rakel Gylfadóttur. Didda Flygenring myndlýsir. Fyrir verkið hlutu þær Sólfaxa – íslensku barnabókaverðlaunin árið 2026.