Þrjár menntaskólastúlkur hyggja á hefndir. Allar hafa þær orðið fyrir kynferðisofbeldi en gerendurnir ekki þurft að gjalda fyrir brot sín. Þær hafa reynt að lifa með afleiðingunum en eru nú komnar upp að vegg. Hvað er til ráða? Ef lifendur hjálpa ekki, væri kannski hægt að fá aðstoð að handan?

Þórdís var fjórtán ára á sextándu öld þegar henni var drekkt fyrir þá sök að hún eignaðist barn eftir misnotkun. Stúlkurnar finna ýmislegt áhugavert um hana og stóradóm, sem gilti á þessum tíma, þegar þær fara að 
 grúska í gömlum gögnum.
Tekst þeim að vekja Þórdísi upp og getur hún hjálpað þeim? Lætur hún að stjórn eða er hún með sitt eigið markmið? Og er hægt að kveða hana aftur niður þegar búið er að vekja hana upp?

Hefnd Þórdísar er átakanleg og myrk saga byggð á þeirri staðreynd að kynferðisbrot hafa gengið eins og rauður þráður í gegnum Íslandssöguna með þeim harmi, reiði og hatri sem slíkum brotum fylgja.