Leikritun er í fókus í þessu hefti Tímaritsins og er það viðeigandi þegar leik-hús landsins eru að hefja göngu sína eftir sumarleyfi og spenntir leikhúsgestir keppast við að raða sínum óskaverkum saman á áskriftarkort. Eftir því sem líður á veturinn saxast á kortin en upplifunin byggist upp á móti og sumar sýningar sitja ljóslifandi í huga þess sem á horfði áratugum síðar. Það sjáum við vel í grein Sveins Einarssonar um íslenska leikritun á seinni hluta síðustu aldar. Katla Ársælsdóttir tekur svo við keflinu og beinir sjónum að þremur íslenskum leikritum frá þessari öld og loks rýnir Gústav Adolf Bergmann Sigurbjörnsson í umtalaðasta verk síðasta leikárs, Óresteiu eftir Benedict Andrews og Æskilos í leikstjórn þess fyrrnefnda. Að öðru leyti kemur efni heftisins úr öllum áttum. Við sögu koma Tarsan apabróðir og skapari hans, Edgar Rice Burroughs, húsagerðarlist í skáldsögum Halldórs Laxness, Viktor Frankenstein og skrímsli hans, Albert Camus, silungsveiði, hjónaferð til Tene og margt margt fleira. Við óskum lesendum góðrar skemmtunar, bæði við lestur heftisins og í menningarveislunni í vetur!