Þessi bók er safn ritgerða um fjölbreytt efni : siðferði , stjórnmál, heilbrigðismál, menntun og listir. Að mati höfundarins, Kristjáns Kristjánssonar heimspekings, er skörungsskapur höfuðkostur í ritgerðasmíð, öryggi í meðferð efnis og fjörsprettir í máli og stíl, og birtist þetta glöggt í hans eigin skrifum. Kristján er skeleggur og skorinorður og skrifar til þess að hreyfa við lesendum sínum, leikum ekki síður en lærðum, þoka skoðunum þeirra um set eða stía þeim í öndverða stefnu.