Þessi bók er um Akrahrepp sem alls telur 90 býli. Í texta og myndmáli er fjallað um hverja einustu jörð sem í ábúð hefur verið einhvern tímann á árabilinu 1781-2007. Gefin er lýsing á jörðinni, getið bygginga og birt tafla yfir fólk og áhöfn á tímabilinu 1703-2000, yfirlit um eignarhald og talsverð söguleg umfjöllun allt frá því jörðin kemur fyrst við heimildir. Lýst er öllum fornbýlum og seljum sem tengjast einstökum jörðum og gefið upp GPS-stöðuhnit þeirra. Ábúendatal fylgir hverri jörð frá 1781-2007 og drjúgur hluti bókar er áhugavert innskotsefni sem tengist jörðunum: þjóðsögur, vísur eða frásagnir af fólki og atburðum. Rík áhersla er lögð á myndefni og er meginhluti þess í litum. Litmynd er af hverjum bæ eins og hann lítur út um þessar mundir, myndir af núverandi ábúendum auk gamalla og nýrra mynda sem sýna atvinnuhætti, örnefni eða gamlar byggingar, svo sem gömlu torfbæina. Bókin er í stóru broti með rúmlega 700 ljósmyndum, kortum og teikningum.