Gula húsið er heildstætt safn sagna eftir Gyrði Elíasson. Gyrðir hefur sent frá sér fjölda ljóðabóka, smásagna og skáldsagna, sem vakið hafa mikla athygli, hér á landi sem erlendis. Gyrðir hefur margoft verið tilnefndur til Íslensku bókmenntaverðlaunanna og hlaut Stílverðlaun Þórbergs Þórðarsonar árið 1989. Gyrðir Elíasson hlaut Bókmenntaverðlaun Halldórs Laxness árið 2000 fyrir Gula húsið, sem valið var úr fjölda innsendra handrita. Í umsögn dómnefndar segir m.a.: „Gula húsið er safn fjölbreyttra og einkar vel skrifaðra smásagna. Í sumum sagnanna renna saman draumur og veruleiki með áhrifamiklum hætti þannig að allt virðist mögulegt og í öðrum vinnur höfundur eftirminnilega úr íslenskri þjóðtrú. Á stundum vekja smásögurnar óhugnað með lesandanum, meðan aðrar einkennast af lágstemmdri kímni. Allar bera sögurnar vott um mikla stílgáfu höfundarins og mynda magnaða og töfrum slungna heild.“