Þær aðstæður koma í lífi okkar allra að við getum ekki annað en horfst í augu og mæst þar sem við erum. Til þess að mæta fólki í augnhæð þurfum við að vera sönn. Þessi bók, Í augnhæð hefur að geyma 52 hugleiðingar, eina fyrir hverja viku ársins. Hver hugleiðing hefst á stuttu ritningarversi sem liggur til grundvallar umfjöllun um hversdagsglímu okkar allra. Fjallað er um vanmátt, efa, veikleika, frelsi, hugrekki og fegurð svo fátt eitt sé nefnt. Hugleiðingarnar eru fyrst og fremst um það hvernig það er að vera manneskja í breyskum heimi.Samhliða bókinni kemur út askja með spjöldum sem geyma styttri útgáfu hugleiðinganna. Mælt er með því nota öskjuna og bókina jöfnum höndum, en draga má spjald yfir daginn eða út vikuna sem áframhaldandi íhugun eða upprifjun úr bókinni.

Séra Guðrún Karls Helgudóttir er sóknarprestur Grafarvogssóknar. Hún hefur lokið Doctor of Ministry-prófgráðu í prédikunarfræðum frá Lutheran School of Chicago og leggur áherslu á að prédika á aðgengilegan hátt á máli sem fólk á auðvelt með að tengja sig við.

Hér er að finna stuttar hugleiðingar út frá hversdagsglímu manneskjunnar, eina fyrir hverja viku ársins. Hugleiðingarnar eru stuttar og hefst hver þeirra á spurningu til íhugunnar. Þær geta staðið einar og sér eða vísað í lengri hugleiðingar í Bókinni, Í augnhæð. Askjan fer vel á borði og er hægt að draga spjald og íhuga yfir daginn eða út vikuna. Einn möguleiki er að byrja á að lesa hugleiðinguna í bókinni og lesa síðan spjaldið sem vísar í hugleiðinguna sem áframhaldandi íhugun eða upprifjun.